Ümummilli lider Heydər Əliyevin anadan olmasının 102-ci ildönümünə həsr olunmuş bədii yaradıcılıq müsabiqə-festivalının seçim turu DİN-in Polis Akademiyası, Azərbaycan Dövlət Neft və Sənaye Universiteti (ADNSU), Azərbaycan Dövlət İqtisad Universiteti (UNEC), Azərbaycan Texnologiya Universiteti, Gəncə Dövlət Universiteti və Odlar Yurdu Universitetində keçirilib. Münsiflər heyəti tərəfindən iştirakçıların çıxışları bədii-estetik dəyərlər, səhnə mədəniyyəti və yaradıcı yanaşma baxımından dəyərləndirilib. İstedadlı gənclərə növbəti mərhələyə keçmək üçün imkan yaradılıb.

Azərbaycan Təhsil İşçiləri Azad Həmkarlar İttifaqı (ATİAHİ)Respublika Komitəsinin və Azərbaycan Respublikası Təhsil Cəmiyyəti İctimai Birliyinin təşkilatçılığı ilə Nizami Kino Mərkəzində “Müasir təhsil sistemində dəyərlərin təbliği” mövzusunda II Milli Təhsil Zirvəsi keçirilib.

Tədbirdə Azərbaycanın müxtəlif bölgələrindən 250-yə yaxın müəllim iştirak edib. Ulu Öndər Heydər Əliyevin, torpaqlarımızın bütövlüyü uğrunda canlarından keçmiş Vətən övladlarının xatirəsi yad edilib. Azərbaycan Respublikasının Dövlət Himni səsləndirilib.

Tədbirdə ATİAHİ Respublika Komitəsinin sədr müavini Mirzə Cəfərzadə Zirvə iştirakçılarını və qonaqları salamlayıb, bundan sonra da belə tədbirlərin keçirilməsinə dəstək olacaqlarını bildirib. Azərbaycan Respublikası Təhsil Cəmiyyəti İdarə Heyətinin sədri Murad Ağalarov Birliyin əsas məqsədinin respublikada fasiləsiz təhsilin həyata keçirilməsinə, təlim-tərbiyənin yüksəldilməsinə yardım göstərmək olduğunu bildirib, tədbirin işinə uğur arzulayıb.

Tədbirdə Milli Məclisin Elm və Təhsil Komitəsinin sədr müavini Fariz İsmayılzadə, millət vəkili Mehriban Vəliyeva, professor Fərrux Rüstəmov, tibb üzrə fəlsəfə doktoru İkram Rüstəmov Türkiyə Cümhuriyyətindən Zirvəyə dəvət olunmuş qonaqlar - Niğde Ömer Halisdemir Universitetinin rektoru prof. Hasan Uslu, İzmir Yaşar Universitetinin prorektoru Hasan Atasoy, “Study in North Cyprus” Assosiasiyasının təsisçisi Selman Arslanbaş, Ankara Atılım Universitetinin Beynəlxalq əlaqələr üzrə direktoru Özgün Özgər təhsil sahəsində tətbiq edilən yeniliklər, təhsil islahatları, təhsildə psixoloji xidmətin aparılması istiqamətində məruzələrlə çıxış ediblər.

Daha sonra “Vətən naminə” Şəhid Ailələrinə Dəstək İctimai Birliyinin sədri, şəhid anası Tünzalə Abduləlimova qeyd edib ki, xalqımızın ən böyük dəyəri Azərbaycan torpağıdır, bu torpağın bütövlüyü uğrunda canlarından keçmiş Vətən oğullarının yetişdirilməsi təhsil müəssisələrinin qarşısında dayanan vacib məsələlərdəndir.  

Sonda VII Muğam müsabiqəsinin diplomantı, xanəndə Mehranə Vəliqızının ifasında “Çırpınırdı Qara dəniz”, “Yaşa Azərbaycan” mahnıları səsləndirilib.

Azərbaycan Dillər Universitetinin (ADU) rəhbərliyi və kollektivi Zaqatala şəhər Şıxəli Qurbanov adına 3 nömrəli tam orta məktəbini ziyarət ediblər. 

Görüş zamanı ADU-nun fəaliyyəti, beynəlxalq əlaqələri, tələbələr üçün yaradılan imkanlar, eləcə də universitetə qəbul qaydaları haqqında ətraflı məlumat verilib.

Məktəb şagirdləri və müəllim kollektivi ilə interaktiv müzakirələr aparılıb və onların sualları cavablandırılıb. Səfərin əsas məqsədi orta məktəblərlə universitet arasında əməkdaşlığı gücləndirmək, şagirdləri ali təhsil imkanları barədə məlumatlandırmaq və onların gələcək ixtisas seçimində dəstək göstərməkdir.

Qeyd edək ki, görüşdə ADU Tələbə Həmkarlar İttifaqı Komitəsi tərəfindən təşkil olunan intellektual oyunun qalibləri mükafatlandırılıb. Həmçinin, 

şagirdlərə Azərbaycan Həmkarlar İttifaqları Konfederasiyası (AHİK) tərəfindən hazırlanmış xüsusi hədiyyələr təqdim olunub.